Flagoj

Ne por ĉiuj, ĉar iuj flagoj ankoraŭ mankas en Unikodo. Temas pri flagoj de iuj landoj (ne universale agnoskitaj), iuj gentoj, iuj ularoj, kaj aliaj flagoj, kiuj estas utilaj aŭ mojosaj, sed tamen ne havas propran signon.

En sociaj retoj, bildosignoj kutime okupas nur malgrandan kvadraton da spaco. Se la bildo havas ĉirkaŭ si liberan spacon, ĝi okupos nur parton de tiu kvadrato, kaj estos malpli bone videbla, ol se ĝi okupus la tutan kvadraton. Tial sencus, ke la flago okupu laŭeble plej multan spacon en la bildo; kaj iuj aliaj flagaj bildosignaroj vere tion faras.

Sed konsideru, ke diversaj flagoj havas diversajn proporciojn. Ekzemple, la flago de Armenujo estas duoble tiom larĝa, kiom ĝi estas alta, dum la flago de Svisujo estas kvadrata (do same larĝa, kiom ĝi estas alta). Se la flagoj okupus ĉiun eblan spacon, la flago de Svisujo okupus la tutan bildon (ĉar ankaŭ la bildo estas kvadrata), dum la flago de Armenujo povus okupi nur duonon de la bildo (aŭ oni devus streĉi ĝin, kaj tio evidente fuŝus ĝian aspekton).

Tial mi atentis, ke ĉiu flago kovru simile grandan parton de sia kvadrato, por ke flagoj de malsamaj proporcioj aperu simile grandaj. Iuj propraj bildosignaroj kaj unikodaj signoformoj tre malbonas je tio!

Ne! La flagoj de Afganujo, Belarusujo, kaj Rusujo estas neoficialaj kaj protestaj, ĉar mi ŝatas demokration kaj homajn rajtojn (kiujn la registaroj de ĉi tiuj landoj longatempe subpremas).

Jes; mia celo ne estas kovri ĉiujn ekzistantajn TASulajn flagojn, sed nur la plej bezonajn. La nuancoj de homaj seksemo kaj seksa sinsento tre varias inter individuoj, tiom ke oni povus ellabori centojn aŭ milojn da kategorioj, laŭ la plej etaj detaloj. Iuj homoj volonte tion faras, kaj kreas por tiuj abundaj kategorioj diversajn flagojn. Mi mem opinias tion nebezone troa.

Ĉi tiuj bildosignoj strebas kovri ĉiun specon de seksemo kaj seksa sinsento, tiel ke ĉiu persono facile trovu sian flagon ene, kaj neniu estu ellasita. Mi ĝenerale volas eviti flagojn, kiuj kovras neniujn novajn personojn, kaj nur kreas pli multajn distingojn inter la personoj jam kovritaj. Malgraŭ tio, la bildosignaro jam havas kelkajn tiajn flagojn popularajn. Se tio ne sufiĉas al vi, vi kompreneble povas fari vian propran aldonon.

Aliseksemo estas universale akceptata kaj rigardata kiel ordinara. Kontraste, la rajtoj de TASuloj ne estas universale akceptataj, kaj la koncernaj personoj ofte suferas miskomprenon kaj mistraktadon. Tial la TASulaj flagoj funkcias kiel simboloj de lukto por egaleco, kiuj unuigas kaj fortigas la malavantaĝulojn. Uzi tiel same flagon de aliseksemuloj, kiuj plej ofte suferas neniun malegalecon kaj neniun socian malavantaĝon, ne vere havas sencon, kaj tia uzo estas ofte kaj prave kritikata.

Sed oni facile forgesas, ke la flagoj ne estas uzataj nur kiel simboloj de socie justa lukto, sed tre ofte ankaŭ kiel simplaj informiloj, aŭ kiel informaj ornamoj. Tio veras precipe interrete, kiam oni uzas ilin en bildosigna formo. Se samseksemulo povas esprimi sian seksemon per bela flago en sia profilo, kial aliseksemulo ne povu fari same?

Se vi ne volas havi tiun flagon (eble ĉar vi timas misuzadon), vi kompreneble rajtas forigi ĝin de via kopio de la bildosignaro. Sed mi opinias, ke ĝia ekzisto estas tute enorda, kaj ke ĝi meritas sian lokon en la bildosignaro.

En la jaro 2018, Daniel Quasar kreis modifitan version de la kutima ĉielarka flago, kun aldonita triangulo reprezentanta transseksulojn kaj rasajn malplimultojn per siaj koloroj. Mi neniel malŝatas tiun intencon, sed la flago efektive reprezentas du aferojn, kiujn mi ja malŝatas:

1. Troprecizigo. La ĉielarko jam estas tre ĝenerala simbolo, kiu taŭgas por universala reprezentado de ĉiuj TASuloj. Ne ĉiu grupo devas havi ĉiujn siajn kolorojn kaj simbolojn en la flago, nek sian propran literon en la mallongigo. Tio rezultigas absurde malsimplajn flagojn kaj absurde longajn mallongigojn, kaj apenaŭ helpas la tutan grupon je universala akceptiĝo.
2. Mallibereco. La flago eldoniĝis sub la mallibera permesilo CC BY-NC-SA. Kvankam mi ne certas, ĉu kopirajto efektive validas por tiom ĉi simpla grafikaĵo, malplaĉas al mi, ke la aŭtoro malzorgis kulturan liberecon kaj intencis limigi uzadon de la flago.

Tial mi preferas ne havi tiun flagon en mia bildosignaro, kaj anstataŭe rekomendas uzi la kutiman ĉielarkan flagon. Se vi tamen deziras havi la »progresan« flagon, vi certe rajtas fari vian propran aldonon.